Daga, Sani Gazas Chinade, Maiduguri
A wani bikin da aka gudanar a jihar Borno, rundunar hadin gwiwa ta OPHK ta mika wasu 1qmata biyu Miss Alice Laksha da Miss Vena wadanda suka samu kubuta daga hannun ‘yan ta’addar Boko Haram a hukumance ga gwamnatin jihar Borno.
Wannan al’amari mai cike da tausayawa ya kawo karshen bala’i mai ban tausayi ga matan da suka shafe shekaru da dama a tsare a karkashin ikon ‘yan ta’adda.
Miss Alice Laksha, ‘yar shekaru 42, ‘yar asalin jihar Borno, ta shafe shekaru shida a hannunsu bayan da aka yi garkuwa da ita tare da wasu mata biyu ma’aikatan kungiyar agaji ta Red Cross a watan Maris din 2018.
An mata auren dole da wani shugaban ‘yan ta’adda mai suna Abu umar. daga baya bayan an kashe shi a 2022, a ƙarshe Alice ta sami ƙarfin hali don tserewa daga hannun masu garkuwa da ita a ranar 24 ga Oktoba, 2024.
Cikin ƙarfin hali ta ba da rahoton wahalar da ta sha a hannun ‘yan ta’addan ga Rundunar Haɗin gwiwa a ranar 29 ga Oktoba, 2024.
Ita kuwa Miss Vena, kanwar marigayi Kofur Samuel Andrew na sojan Najeriya, an sace ta a ranar 19 ga Oktoba, 2022, a lokacin da take kan hanyar zuwa don jana’izar dan uwanta yadda ta shafe shekaru hudu a tsare a karkashin ikon shugaban ‘yan ta’adda Muhammad Sheikh kafin rundunar hadin gwiwa ta kubutar da ita.
Rundunar hadin gwiwa a karkashin jagorancin Manjo Janar W Shabu, ta jaddada kudirinta na maido da zaman lafiya a yankin Arewa maso Gabas.
Nasarar kubutar da ’yan’uwan mata biyu ya zama ginshikin bege ga sauran da ake tsare da su kuma shaida ce ga sadaukarwar da sojojin suka yi.
A cikin wata sanarwa da kwamishinar harkokin mata ta Jihar Borno a madadin Gwamnna Zulum ta ce, gwamnatin jihar Borno ta yi maraba da dawowar Alice da Vena da hannu biyu, gwamnati ta yi alƙawarin bayar da tallafin da ya dace don gyara lamurran matan biyu da kuma shigar da su cikin al’umma, ciki har da kula da lafiyar su, taimakon harkokin jin daɗi, da kuma taimakon sake saduwa da iyalansu.
An kammala bikin da yin kira ga zaman lafiya da sulhu, inda ta bukaci sauran mutanen da har yanzu suke tsare, da su yi koyi da karfin hali irin Alice da Vena tare da mika wuya domin samun afuwa da goyon bayansu ga komawa cikin al’umma.
