Tsohuwar Uwargidar Shugaban Ƙasa, Hajiya Aisha Buhari, ta kai ziyartar ta’aziyya ga Gwamnan Jihar Katsina, Malam Dikko Umaru Radda, a ranar Juma’a, biyo bayan rasuwar mahaifiyarsa ƙaunatacciya, Hajiya Safara’u Umaru Barebari.
Tana tare da ɗanta, Yusuf Buhari, da ‘ya’yanta mata, an tarbe su cikin farin ciki da girmamawa daga Gwamna Radda da matarsa, Hajiya Fatima Dikko Radda, a Katsina House dake Abuja.
Iyalin Buhari sun yi addu’o’i domin samun rahamar Allah ga mamaciyar, tare da roƙon Allah Madaukakin Sarki da ya ba Gwamna Radda, iyalinsa da al’ummar Jihar Katsina gaba ɗaya haƙuri da ƙarfin zuciya wajen jure wannan babban rashi.
